دوسری جنگ عظیم کا پراسرار بنکر دریافت۔۔

بین الاقوامی میڈیا کے مطابق چینی ماہرین آثار قدیمہ نے دوسری جنگ عظیم کا ایک پرسرار بنکر دریافت کیا ہے،جہاں چینی فوجیوں پرتشدد کیا جاتا رہا،اس بنکر میں جاپانی عسکری سائنسداںوں نے چینی جنگی قیدیوں اور دیگر افراد پر عجیب وغریب اور ہولناک طبی تجربات کئے تھے جن کا تذکرہ جنگی تاریخ میں بھی ملتا ہے۔ میڈیا رپورٹس کے مطابق جاپانی شاہی افواج نے اسے یونٹ 731 کا نام دیا تھا۔ چینی علاقے اینڈا کے پاس بنکر میں 1935 سے 1945 تک ہولناک سائنسی تجربات کئے گئے تھے۔ جاپانیوں نے چینی قیدیوں کو بے ہوش کئے بغیر ان کی سرجری کی، ان پر جراثیم کے اثرات دیکھے اور کئی طرح کے کیمیائی تجربات کے لیے انہیں تختہ مشق بنایا گیا تھا، رپورٹس کے مطابق چینی قیدیوں پر طرح طرح کی بیماریوں کے جراثیم بھی آزمائے گئے کیونکہ جاپانی چین کی بڑی آبادی کو ٹائفائیڈ، ہیضے اور طاعون کا شکار بنانا چاہتے تھے۔ یہی وجہ ہے کہ ان کے پھیلاؤ کو محدود رکھنے کے لیے زیرِ زمین بنکروں میں ایسے تجربات کئے گئے تھے۔ چینی ماہرین کی دریافت کے بعد سرنگ نما بنکر میں کئی کیمرے، پنجرے نما سیل، آپریشن تھیٹر اور آلات بھی ملے ہیں۔