امریکی خفیہ دستاویزات کی نجی دفتر سےبرآمدگی کا معاملہ،تحقیقات کا دائرہ وسیع |
|
جمعرات 12 جنوری 2023ء | |
بین الاقوامی میڈیا کے مطابق جو بائیڈن انتظامیہ کی خفیہ دستاویزات کا پہلا حصہ واشنگٹن ڈی سی میں ایک نجی دفتر سے برآمد ہوا تھا جو بطور نائب امریکی صدر امریکا جو بائیڈن کے زیر استعمال رہا،تاہم تاحال یہ معلوم نہیں ہو سکا ہے کہ خفیہ دستاویزات کا دوسرا حصہ کب اور کہاں سے ملا ہے ، امریکی محکمہ انصاف کے مطابق معاملے کی ہر پہلو سے تحقیقات جاری ہیں۔ وائٹ ہاؤس کی جانب سے خفیہ دستاویزات کے دوسرے بیچ کی تصدیق نہیں ہوئی سی بی ایس نے دستاویزات ملنے کی تصدیق کی ہے۔ امریکی صدر جو بائیڈن کی خفیہ دستاویزات کا پہلا حصہ نومبر میں وائٹ ہاؤس کے قریب واقع ایک تھنک ٹینک پین بائیڈن سینٹر سے برآمد ہوا تھا،جن میں جو بائیڈن دور کی دستاویزات میں مبینہ طور پر امریکی اداروں کی یوکرین، ایران اور برطانیہ سے متعلق رپورٹس بھی شامل ہیں۔ خفیہ دستاویزات کی بر آمدگی کے حوالے سے امریکی صدر جو بائیڈن کچھ دن پہلے بھی کہہ چکے ہیں کہ خفیہ دستاویزات ملنے پر حیران ہوں، محکمہ انصاف معاملے کو بغور دیکھ رہا ہے۔ دوسری جانب امریکی ایوان نمائندگان کی احتساب اور جائزہ کمیٹی کے مطابق خفیہ دستاویزات کی برآمدگی کے حوالے سے امریکی صدر اور انکے خاندان سے بھی پوچھ گچھ کی جا سکتی ہے۔ |