اسرائیلی فوج کا غزہ میں الشفاء ہسپتال پر حملہ،عملے اور شہریوں پر تشدد

اسرائیل نے غزہ کے الشفاء ہسپتال پر ٹینکوں سمیت دھاوا بول دیا،عملے اور مریضوں پر تشدد بین الاقوامی میڈیا رپورٹس کے مطابق قابض اسرائیلی فوج غزہ کے الشفا اسپتال میں ٹینکوں سمیت داخل ہوگئی۔ عینی شاہدین کے مطابق 6 اسرائیلی ٹینک اور ایک سو سے زائد اسرائیلی فوجیوں نے اسپتال میں گھس کر عملے اور مریضوں پر بدترین تشدد کیا، دوسری جانب حماس کی وزارت صحت نے کہا ہے کہ اس وقت اسپتال میں تقریبا 2300 افراد موجود ہیں جن میں 650 مریض، 2 سو سے 5 سو تک عملے کے افراد اور تقریباً 1500 تک عام شہری موجود ہیں۔ میڈیا رپورٹس کے مطابق حماس نے الشفا اسپتال کے محاصرے اور اسرائیلی حملے کا ذمہ دار امریکی صدر جوبائیڈن کو قرار دیتے ہوئے کہا کہ اسرائیل نے یہ اقدام امریکا کی اجازت کے بعد اٹھایا ہے۔ حماس کا کہنا ہے کہ اسرائیل اسپتال کو فوجی مقاصد کے لیے استعمال کرنے کا جھوٹا الزام لگا کر اسپتال پرحملے کر رہا ہے۔ ادھر وائٹ ہاؤس کے ترجمان کا کہنا ہے کہ ہم ہسپتال پر حملہ اور فائرنگ نہیں دیکھنا چاہتے۔ اسرائیل کے غزہ پر حملوں میں خواتین اور بچوں سمیت 12 ہزار سے زائد فلسطینی شہید ہوچکے ہیں۔