دوران عدت نکاح کیس،خاور مانیکا نے جج پر عدم اعتماد کا اظہار کر دیا ،فیصلہ محفوظ

خاور مانیکا نے دوران عدت نکاح کیس کی اپیلیں کرنے والے جج شاہ رخ ارجمند پر عدم اعتماد کردیا۔ جج نے ریمارکس دیے میری پوری زندگی میں یہ پہلا کیس ہے کہ کوئی مجھ پر عدم اعتماد کررہاہے۔ عدالت نے عدم اعتماد کی درخواست پر فیصلہ محفوظ کرلیا۔ ڈسٹرکٹ اینڈ سیشن جج شاہ رخ ارجمند نے دوران عدت نکاح کیس میں سزا کیخلاف اپیلوں پر سماعت کی۔ شکایت کنندہ خاور مانیکا نے سیشن جج شاہ رخ ارجمند پر عدم اعتماد کا اظہار کر دیا۔ استدعا کی کہ کیس کسی اور عدالت میں ٹرانسفر کیا جائے۔ جج شاہ رخ ارجمند نے پوچھاکہ آپ نے کیسے سوچ لیا کہ عدالت کسی کی ہمدردی میں چلی گئی ہے؟ آپ نے اور میں نےقبرمیں جانا ہے، میری حد تک کیا مسئلہ ہے بتا دیں؟ خاور مانیکا نے کہاکہ پورے خاندان میں مشہور ہے کہ جج صاحب ملزمان کوبری کردیں گے۔ پی ٹی آئی وکیل سلمان اکرم نے کہاکہ ایک جملے پر کیس ٹرانسفر کرنے کا کہنا توہین عدالت میں آتا ہے۔ جسٹس بابر ستار نے عدم اعتماد کی درخواست پر جرمانہ عائد کیا ہے۔ دوران سماعت پی ٹی آئی وکلاء اور خاور مانیکا کے درمیان سخت جملوں کا تبادلہ بھی ہوا۔ جج شاہ رخ ارجمند نے عدم اعتماد کی درخواست پر فیصلہ محفوظ کرلیا۔