نواز شریف کی جلد وطن واپسی،حکمت عملی تیار

نواز شریف کی وطن واپسی کے حوالے سے نئی پیش رفت،پنجاب اور خیبر پختونخواہ اسمبلی تحلیل ہونے کی صورت میں ضمنی انتخابات کی الیکشن مہم خود چلائیں گے مسلم لیگ ن کے ذرائع نے انکشاف کیا ہے کہ قائد مسلم لیگ ن نواز شریف کی جلد واپسی کے حوالے سے بھی حکمت عملی تیار کر لی گئی ہے،جس کے مطابق اگر تحریک انصاف کے سربراہ عمران خان نے پنجاب اور کے پی اسمبلیاں تحلیل کر دیں تو وہاں آئین کے مطابق 90 روز کے اندر نئے انتخابات کروا دیے جائیں گے اور ان صوبائی انتخابات کی الیکشن مہم بھی وہ خود آکر چلائیں گے۔ذرائع نے دعویٰ کیا ہے کہ اس صورت حال میں نواز شریف کسی بھی وقت وطن واپس آسکتے ہیں، نواز شریف نے اس سلسلے میں اپنے وکلاء سے مشاورت بھی مکمل کرلی ہے۔ جس کے تحت عدالتوں میں ان کی سزاؤں پر زیرسماعت نظرثانی کی اپیلوں کی پیروی شروع کر دی جائے گی۔ ذرائع کےمسلم لیگ ن کے قائد نے فیصلہ کر لیا کہ اب خود کو ملکی سیاست سے دور نہیں رکھیں گے اور براہ راست اپنی پارٹی اور حامیوں کی اگلے الیکشن میں رہنمائی کریں گے۔ ذرائع کے مطابق میاں نواز شریف کی تاحیات نااہلی کا کیس اب کمزور پڑ چکا ہے اور سپریم کورٹ کی طرف سے فیصل واوڈا کی تاحیات نااہلی کے خاتمے کے فیصلے نے مسلم لیگ کے قائد کی قومی سیاست میں واپسی کی راہ میں رکاوٹ دور کر دی گئی ہے۔