رستم زماں گاما پہلوان کی زندگی پر فلم بنانے کی تیاریاں

غیر ملکی میڈیا کو دیئے گئے ایک انٹرویو میں ناصر ادیب کا کہنا تھا کہ گاما پہلوان کے حوالے سے بنائی جانے والی فلم اٹھارہ سو اٹھہتر سے انیس سو سینتالیس تک کے دور پر مشتمل ہوگی جس میں فلم بینوں کو ایک اصلی ہیرو کی کہانی دیکھنے کو ملے گی،ایسا ہیرو جس کو کبھی اسکی زندگی میں کوئی شکست نہیں دے سکا ناصر ادیب کا کہنا تھا کہ گاما پہلوان کے حوالے سے بنائی جانے والے فلم میں انکی ذاتی زندگی اور اکھاڑے سمیت دیگر پہلو شامل ہونگے،تاہم گاما کا کردار کون ادا کرے گا اسکا تاحال فیصلہ نہیں ہوا ان کا مزید کہنا تھا کہ گاما پہلوان کے حوالے سے بنائی جانے والی فلم ایک کمرشل فلم ہوگی جس میں کمرشل فلم کے تمام تقاضے بشمول،رومانس،جذبات،مزاح، موسیقی وغیرہ شامل ہونگے واضح رہے کہ ناصر ادیب اس سے قبل پاکستان کی بلاک بسٹر فلم دی لیجنڈ آف مولاجٹ لکھ چکے ہیں جس کو پوری دنیا میں پذیرائی ملی ہے اور یہ پاکستان کی سب سے زیادہ بزنس کرنے والی فلم ہے