مودی سرکار بھارتی مزدوروں کو فلسطینیوں کی جگہ اسرائیل بھیجنے کی ڈیل منسوخ کرے،بھارتی ٹریڈ یونینز کا مطالبہ |
|
اتوار 12 نومبر 2023ء | |
بھارت میں بڑی ٹریڈ یونینزنے مودی حکومت سے مطالبہ کیا ہے کہ اسرائیل کے ساتھ وہ معاہدہ ختم کیا جائے جس کے تحت ہزاروں بھارتی مزدوروں کو فلسطینی تعمیراتی کارکنوں کی جگہ اسرائیل میں کام پر رکھ لیا جائے گا۔ کشمیر میڈیا سروس کے مطابق اسرائیل نے غزہ پر وحشیانہ جارحیت کے بعد فلسطینی مزدوروں کے ورک پرمنٹ منسوخ کر دیے ہیں۔ جس کے بعد اسرائیل بھارتی مزدوروں کو انکی جگہ ملازمت فراہم کرےگا تاہم سینٹر آف انڈین ٹریڈ یونینز (سی آئی ٹی یو)، آل انڈیا ٹریڈ یونین کانگریس (اے آئی ٹی سی یو)، انڈین نیشنل ٹریڈ یونین کانگریس (آئی این ٹی سی یو)، ہند مزدور سبھا (ایچ ایم ایس) اور کئی دیگر بھارتی ٹریڈ تنظیموں نے ملک کی بڑی ٹریڈ یونین تحریکوں پر زور دیا کہ وہ فلسطینی مزدوروں کو تبدیل کرنے سے انکار کرکے ان کے ساتھ یکجہتی کا اظہار کریں۔ ٹریڈ یونین تنظیموں نے ایک کھلے خط میں کہا کہ بھارت کے لیے اس سے زیادہ غیر اخلاقی اور تباہ کن کوئی چیز نہیں ہو سکتی کہ وہ اپنے مزدور اسرائیل بھیجے۔ واضح رہے کہ غزہ پر اسرائیلی جارحیت میں اب تک بارہ ہزار سے زائد بے گناہ فلسطینی شہید ہو چکے ہیں جن میں زیادہ تعداد بچوں اور خواتین کی ہے۔ |