کامسیٹس یونیورسٹی،پرچے میں غیر اخلاقی سوال کا معاملہ،انکوائری کمیٹی کی رپورٹ تیار

وزارت سائنس و ٹیکنالوجی کی جانب سے کامسٹس یونیورسٹی کے امتحان میں ایک پرچے میں غیراخلاقی سوال شامل کرنے کے معاملے پر قائم انکوائری کمیٹی کی رپورٹ مکمل ہوگئی، رپورٹ میں لیکچررپر پابندی کی سفارش کی گئی ہے۔ انکوائری کمیٹی کی رپورٹ میں کہا گیا ہے کہ سابق لیکچرر خیر البشرسے ملاقات ہو سکی، نہ ہی رابطہ ہوا۔انکوائری کمیٹی نے وزٹنگ فیکلٹی ممبر پر ایف آئی آر درج کرانے اور کیس وفاقی تحقیقاتی ایجنسی(ایف آئی اے) کے سپرد کرنے کی بھی سفارش کی ہے۔ رپورٹ میں کہا گیا ہے کہ تحقیقات کے ذریعے ہی وزٹنگ فیکلٹی ممبر سے اصل حقائق کا پتا لگایا جاسکتا ہے۔ کمیٹی نے ایچ ای سی کے ذریعے لیکچرر پر پابندی عائد کرنے کی سفارش کرتے ہوئے کوئز کو ریگولیٹ کرنے کی تجویز بھی دے دی۔ انکوائری کمیٹی رپورٹ کے مطابق کوئز کو مکمل طور پر ٹیچر کی صوابدید پر نہیں چھوڑنا چاہیے۔ کمیٹی نے وزٹنگ فیکلٹی کی بھرتی، انٹرویو پینل میں سائیکلوجسٹ شامل کرنے کی تجویز بھی دی ہے،تاکہ مستقبل میں ایسے مسائل سے بچا جا سکے