کیپٹل گین ٹیکس کی شرح اور دورانیے میں کمی کی جائے،عاطف جمیل بٹ

اسلام آباد اسٹیٹ ایجنٹس ایسو سی ایشن کے راہنماء عاطف جمیل بٹ نے حکومت سے مطالبہ کرتے ہوئے کہا ہے کہ پورے ملک میں ڈیمیڈ رینٹل انکم ٹیکس ختم کیا جائے، کیپٹل گین ٹیکس کا دورانیہ اور شرح میں کمی، فائلر پر ٹیکس ایک فیصد اور نان فائلرز پر تین فیصد کیا جائے. اس حوالے سے اسلام آباد ریئل اسٹیٹ ایجنٹس کا ایک وفد بہت جلد وفاقی وزیر خزانہ سے ملاقات کر کے ملکی معیشت اور ریئل اسٹیٹ سیکٹر کی بہتری کیلئے اپنی بجٹ تجاویز پیش کرے گا۔ عاطف جمیل بٹ نے مزید کہا کہ درآمدی ڈیوٹی زیادہ ہونے اور ایل سیز بند ہونے کیوجہ سے تعمیراتی انڈسٹری کا کام ٹھپ ہوگیا ہے جو ملکی معیشت کیلئے نقصان دہ ہے ریئل اسٹیٹ انڈسٹری کو مراعات اور ٹیکسز میں ریلیف دیئے جانے سے ملکی معیشت میں بہتری لائی جا سکتی ہے. انہوں نے مطالبہ کیا کہ رئیل اسٹیٹ سیکٹر کی روانی کیلئے تعمیراتی انڈسٹری سے متعلق درآمدی اشیاء پر امپورٹ ڈیوٹی کم کی جائے تاکہ لوگوں کو گھر بنانے میں آسانی ہو اور ایل سیز کھولی جائیں تاکہ پراجیکٹس کی فنشنگ ممکن ہو سکے.