ملکی خزانہ لوٹنے والوں کے علاوہ سب سے مفاہمت ہوسکتی ہے،عمران خان

سابق وزیر اعظم اور چیئرمین پاکستان تحریک انصاف عمران خان نے صحافیوں سے گفتگو کرتے ہوئے کہا کہ اپنے ساتھ ہونے والی زیادتیاں معاف کردوں گا اعظم سواتی اور شہباز گل کے ساتھ ہونے والے سلوک کو بھی معاف کرنے کے لیے تیار ہیں۔ سابق وزیر اعظم کا کہنا تھا کہ فوج کے بغیر پاکستان آگے نہیں بڑھ سکتا، فوج نے کورونا اور پولیو ویکسینیشن کے لیے قابل قدر کام کیا ہے،اس دوران فوج کو بہت قریب سے دیکھنے کا موقع ملا، فوج اچھائی کی سب سے بڑی قوت بن سکتی ہے عمران خان کا کہنا تھا کہ اسٹیبلشمنٹ کو بھی سوچنا ہو گا کہ ملک گڑھے میں گر چکا ہے اور جس نے پاکستان کو چلانا ہے وہ اسٹیبلشمنٹ کے ساتھ لڑائی نہیں کرسکتا لیکن اسٹیبلشمنٹ کی سمت کا تعین کرنا بھی ضروری ہے۔ ان کا کہنا تھا کہ میں سوچ بھی نہیں سکتا تھا کہ پنجاب کی خواتین اراکین اتنا اچھی کارکردگی دکھائیں گی، پی ٹی آئی کی خواتین کو لالچ دینے کی کوشش کی گئیں لیکن انہوں نے سب کچھ ٹھکرا دیا۔ ملکی خزانہ کو لوٹنے والوں کے علاوہ سب سے مفاہمت ہوسکتی ہے۔ چیئرمین پی ٹی آئی نے کہا کہ میں بہت جلد انتخابات دیکھ رہا ہوں ،مونس الہٰی ڈٹ گیا، میں چودھری پرویزالہٰی کی بھی قدر کرتا ہوں، چودھری پرویز الہٰی نے لالچ کے ہر حربے کو ٹھکرا دیا ،مونس الہٰی بہت سمجھدار نوجوان ہے۔