یو ایس ایڈ ایڈمنسٹریٹر کا وزیر خارجہ جلیل عباس جیلانی سے رابطہ،افغان پناہ گزینوں اور غزہ کی صورتحال پر بات چیت

یوایس ایڈ کی ایڈمنسٹریٹر سمانتھا پاوور کا وزیر خارجہ جلیل عباس جیلانی سے رابطہ،غزہ کی صورتحال،پاکستان گرین الائنس اور افغان پناہ گزینوں کے حوالے سے امور پر بات چیت امریکی سفارتخانے کی طرف سے جاری بیان کے مطابق یو ایس ایڈ کی ایڈمنسٹریٹر سمانتھا پاور نے پاکستان کے وزیر خارجہ جلیل عباس جیلانی سے رابطہ کیا۔ ترجمان کے مطابق پاکستانی وزیر خارجہ سے بات چیت کے دوران یو ایس پاکستان گرین الائنس کے تحت سیلاب کے بعد بحالی، موسمیاتی تبدیلیوں اور وسیع تر کوششوں پر پاکستان میں یو ایس ایڈ کے کام پر تبادلہ خیال کیا گیا ترجمان کے مطابق رابطے کے دوران غزہ میں سنگین انسانی بحران، اور ضرورت مند شہریوں کو زندگی بچانے والی خوراک، پانی، طبی دیکھ بھال اور دیگر اہم امداد فراہم کرنے کے لیے امریکہ اور دیگر ممالک کی کوششوں کے حوالے سے امور بھی زیر غور آئے۔ سفارتخانے کے مطابق ایڈمنسٹریٹر پاور نے پاکستان میں افغان پناہ گزینوں اور پناہ گزینوں کے تحفظ کی اہمیت کے حوالے سے بھی وزیر خارجہ جیلانی کے ساتھ بات چیت کی کہ کس طرح امریکہ اور پاکستان اہل پناہ گزینوں کی محفوظ اور موثر آباد کاری اور امریکہ میں منتقلی کی سہولت فراہم کرنے کے لیے مل کر کام کر سکتے ہیں۔