افغانستان سے چمن میں پاکستانی علاقے پر فائرنگ،دو شہری شہید،پاکستان کا سخت ردعمل

افغانستان سے صوبہ بلوچستان کے علاقے چمن میں بلااشتعال فائرنگ سے بارہ سالہ بچے سمیت 2 معصوم پاکستانی شہری شہید اور ایک بچہ زخمی ہو گیا۔، آئی ایس پی آر کے مطابق فائرنگ کا یہ واقعہ زیرو لائن پر پاک، افغان سرحد پر چمن بارڈر کراسنگ کے دوستی گیٹ پر شام 4 بجے پیش آیا۔دوستی گیٹ پر تعینات افغان سپاہی نے پاکستان سے افغانستان جانے والے راہگیروں پر اندھا دھند فائرنگ کی۔ پاکستانی فوجی دستوں نے جانی نقصان سے بچانے کے لیے انتہائی تحمل کا مظاہرہ کیا اور بے گناہ مسافروں کی موجودگی میں فائرنگ کے تبادلے سے مکمل گریز کیا۔واقع میں جاں بحق شہریوں کے جسد خاکی اور زخمی کو ڈی ایچ کیو اسپتال چمن منتقل کر دیا گیا۔ سیکیورٹی فورسز نے زخمی بچے کو فوری طور بچایا جو کہ اب زیر علاج ہے۔ افغان حکام سے اشتعال انگیزی کے مجرم کو پکڑ کر پاکستانی حکام کے حوالے کرنے کا مطالبہ کیا گیا ہے اور غیر ذمہ داری اور لاپرواہی کی وجہ دریافت کی گئی ہے۔ آئی ایس پی آ ر کے مطابق عبوری افغان حکومت سے اس توقع کا اظہار کیا گیا ہے کہ وہ اپنے فوجیوں کو مستقبل میں نظم و ضبط کا پابند کرے گی اس طرح کے واقعات سے بچنے کے لیے ذمہ داری کا مظاہرہ کیا جائے گا۔پاکستان مثبت، تعمیری دوطرفہ تعلقات کے ذریعے امن، خوشحالی، ترقی میں کردار ادا کرنے کے لیے پرعزم ہے،ایسے ناخوشگوار واقعات سے خلوص نیت اور بامقصد نکات کو نقصان پہنچنے کا خدشہ ہے۔