شہریار آفریدی کی نظر بندی معطل کرنے کا معاملہ،ڈسٹرکٹ مجسٹریٹ اسلام آباد نے انٹراکورٹ اپیل کردی

ڈسٹرکٹ مجسٹریٹ اسلام آباد نے شہر یار آفریدی کی تھری ایم پی او کے تحت گرفتاری کے آرڈر کو معطل کرنے کے فیصلے کیخلاف اسلام آباد ہائیکورٹ میں انٹرا کورٹ اپیل دائر کردی۔ تفصیلات کے مطابق اسلام آباد ہائیکورٹ میں دائر انٹرا کورٹ اپیل میں ڈسٹرکٹ مجسٹریٹ نے موقف اپنایا ہے کہ جسٹس بابر ستار کی عدالت کا فیصلہ طے شدہ قانونی اصولوں کی خلاف ورزی ہے۔ سنگل بینچ نے فیصلہ سناتے ہوئے جوڈیشل مائنڈ اپلائی نہیں کیا،سنگل بینچ کے فیصلے سے انصاف کا بول بالا نہیں خاتمہ ہوگا ، یہ فیصلہ پبلک آفس ہولڈرز کی حوصلہ شکنی کرے گا کہ وہ عوامی مفاد میں فیصلے کریں۔ درخواست میں ڈسٹرکٹ مجسٹریٹ نے استدعا کی ہے کہ حقائق کو مدنظر رکھتے ہوئے سنگل بینچ کا فیصلہ کالعدم قرار دیا جائے۔ یاد رہے کہ جسٹس بابر ستار نے سولہ اگست کوشہریار آفریدی کی رہائی کا حکم دیتے ہوئے ڈی سی اسلام آباد اور ایس ایس پی آپریشن کیخلاف توہین عدالت کی کارروائی کا آغاز کیا تھا۔