ہزارہ ایکسپریس حادثہ تخریب کاری بھی ہوسکتی ہے،وفاقی وزیر ریلوے سعد رفیق

وزیر ریلوے خواجہ سعد رفیق نے خدشہ ظاہر کیا ہے کہ ہزارہ ایکسپریس کو پیش آنے والا حادثہ کوئی تخریب کاری بھی ہو سکتی ہے۔حادثے میں پندرہ افراد جاں بحق چالیس سے زائد زخمی ہوئے ہیں لاہور میں میڈیا سے گفتگو کرتے ہوئے وفاقی وزیر ریلوےخواجہ سعد رفیق کا کہنا تھا ہزارہ ایکسپریس حادثے میں 15 افراد کے جاں بحق ہونے کی تصدیق ہوگئی ہے جبکہ چالیس سے زائد افراد زخمی ہیں۔ وفاقی وزیرسعد رفیق کا کہنا تھا کہ ٹرین کی رفتار مناسب تھی اور ٹرین جب حادثے کا شکار ہوئی تو 45 کلو میٹر فی گھنٹہ کی رفتار سے چل رہی تھی لیکن پہلے ریلیف اور پھر تحقیقات ہوں گی، ہسپتالوں میں ایمرجنسی نافذ کر دی گئی ہے، خواجہ سعد رفیق کا کہنا تھا وزیر اعلیٰ سندھ مراد علی شاہ سے رابطہ کیا ہے وہ خود موقع پر پہنچ رہے ہیں۔ وفاقی وزیر کا کہنا تھا کہ ہمارے دو تین دن رہ گئے ہیں، ڈر تھا کہ کوئی حادثہ نہ ہو جائے اور ایسا ہی ہوا، یہ تخریب کاری بھی ہوسکتی ہے اور لائن میں مکینیکل فالٹ بھی ہو سکتا ہے، تخریب کاری تھی یا فنی خرابی اس کا فیصلہ ایف جی آئی آر کرے گی۔ واضح رہے کہ کراچی سے حویلیاں جانے والی ہزارہ ایکسپریس کو نوابشاہ میں سرہاری ریلوے اسٹیشن کے قریب حادثہ پیش آیا ہزارہ ایکسپریس ریلوے ٹریک سے اتر گئی جس میں کم از کم 15 افراد کے جاں بحق اور 40 سے زائد کے زخمی ہونے کی اطلاعات ہیں۔