عظمی خان کے خلاف مقدمہ درج |
|
منگل 11 جولائی 2023ء | |
پنجاب میں انسداد بدعنوانی کے محکمے نے تحریک انصاف کے چیئرمین عمران خان کی بہن ڈاکٹر عظمی خان کے خلاف کرپشن کا ایک اور مقدمہ درج کر کے شریک ملزمان کو گرفتار کیا ہے۔ منگل کو اینٹی کرپشن اسٹیبلشمنٹ پنجاب کے ترجمان نے ایک بیان میں کہا ہے کہ ڈاکٹر عظمی خان نے جعل سازی سے کروڑوں روپے کی اراضی غیر قانونی طور پر اپنے نام ٹرانسفر کروائی۔ درج کیے گئے مقدمے کے مطابق اینٹی کرپشن نے عظمی خان کے دو شریک ملزمان افضل سلیانہ نائب تحصیلدار اور اسلم خان پٹواری کو گرفتار کر لیا۔ ترجمان نے بتایا کہ ملزمان نے ضلع جھنگ میں 310 کنال اراضی دھوکہ دہی سے ڈاکٹر عظمی کے نام منتقل کی۔ ایف آئی آر میں الزام عائد کیا گیا ہے کہ ملزمان نے ریکارڈ میں رد و بدل کر کے رقبہ ڈاکٹر عظمی خان کے نام منتقل کیا۔ |