پی ٹی آئی رہنماؤں کے خلاف توہین الیکشن کمیشن کیس،سماعت اٹھائیس مارچ تک ملتوی

دورانِ سماعت پی ٹی آئی رہنماءفواد چوہدری اور ممبران الیکشن کمیشن کے درمیان دلچسپ جملوں کا تبادلہ ہوا۔ فواد چوہدری نے کہاروازنہ صبح اٹھتے ہیں تو نئے مقدمات درج ہوتے ہیں۔ ممبر الیکشن کمیشن نثار درانی نے کہا یہ معاملات سیاسی جماعتوں نے ٹھیک کرنے ہیں۔ فواد چوہدری بولے ہمیں دو اداروں سے امید ہے ،ایک سپریم کورٹ اور دوسرا الیکشن کمیشن، انتخابی ادارے کو نیوٹرل نظرآنا چاہئے،، اس پر ممبر الیکشن کمیشن نے کہا ہم تو ہمیشہ سے نیوٹرل رہے ہیں۔ فواد چوہدری نے کہا ہم الیکشن کمیشن کی بہت زیادہ عزت کرتے ہیں،اس موقع پر پی ٹی آئی کے وکیل فیصل چوہدری نے کہاکہ گزارش ہے کہ معاملے کو ختم کردیں۔ ممبر الیکشن کمیشن شاہ محمد جتوئی نے کہا آپ لوگ روز ٹی وی پہ بیٹھ جاتے ہیں پتہ نہیں ہوتا کہ کب کیا کہا ہے۔ دورانِ سماعت سابق وزیراعظم عمران خان کی حاضری سے استثنیٰ کی درخواست بھی دائر کردی گئی ۔ اس موقع پر فواد چوہدری کا کہنا تھا کہ اگر خان صاحب کو ویڈیو لنک پر لینا چاہیں تو لے سکتے ہیں۔عمران خان نے آنا ہے لیکن سکیورٹی کے مسائل کا سامنا ہے۔ اس پر ممبر الیکشن کمیشن نثار درانی نے کہا یہ آئین و قانون کا مسئلہ ہے ۔الیکشن کمیشن سب لیول پلیئنگ فیلڈ فراہم کرے گا۔ بعد ازاں الیکشن کمیشن نے کیس کی سماعت اٹھائیس مارچ تک ملتوی کردی