وزیراعظم شہباز شریف کا ترکیہ کے صدر طیب اردوان کو ٹیلیفون،عید کی مبارکباد دی

ترجمان وزیراعظم آفس کے مطابق وزیراعظم محمد شہباز شریف نے ترکیہ کے صدر رجب طیب ایردوان سے ٹیلی فونک رابطہ کیا اور ترکیہ کی حکومت، قیادت اور عوام کو عیدالفطر کی مبارکباد دی۔ انہوں نے جنوب مشرقی ترکیہ میں 6 فروری کے زلزلے کے متاثرین کے لیے دعا بھی کی اور بحالی اور تعمیر نو کے مرحلے کے دوران ترکیہ کے ساتھ کھڑے ہونے کے پاکستان کے عزم کا اعادہ کیا۔ ترجمان وزیراعظم آفس کے مطابق ترکیہ کے صدرطیب ایردوان نے وزیر اعظم کی عید کی مبارکباد کا گرمجوشی سے جواب دیا اور پاکستانی عوام کے لیے اپنے خصوصی برادرانہ جذبات اور پیار کا اظہار کیا۔ ترک صدر نے زلزلے کے دوران مشکل کی گھڑی میں ترکیہ کی حکومت اور عوام کے ساتھ کھڑے ہونے پر پاکستانی عوام اور حکومت کا شکریہ ادا کیا اور پیغام دیا کہ وہ پاکستان کی مدد اور مدد کو کبھی فراموش نہیں کریں گے۔ ترک صدر نے زلزلے کے بعد وزیراعظم کے دورہ ترکیہ کو بھی سراہتے ہوئے کہا کہ پاکستانوں نے جس محبت کا مظاہرہ کیا وہ ہمیشہ یاد رکھیں گے۔ ترجمان کے مطابق دونوں رہنمائوں نے دونوں برادر ممالک کے درمیان بہترین دوطرفہ تعلقات پر اطمینان کا اظہار کیا اور باہمی دلچسپی کے تمام شعبوں خصوصاً تجارت، معیشت، خوراک کی حفاظت اور متبادل توانائی کے شعبوں میں تعاون کو مزید آگے بڑھانے کے عزم کا اعادہ کیا۔ انہوں نے تمام اہم علاقائی اور عالمی مسائل پر ایک دوسرے کے ساتھ قریبی رابطے میں رہنے کے عزم کا اعادہ بھی کیا۔ وزیراعظم نے صدر ایردوآن کو دورہ پاکستان کی دعوت بھی دی جسے انہوں نے قبول کر لیا.