اسلام آباد پولیس نے عمران خان کے خلاف کیسز کی رپورٹ عدالت میں جمع کرادی |
|
منگل 28 مارچ 2023ء | |
عمران خان کے خلاف کیسز کی تفصیلات کے حوالے سے درخواست کی سماعت چیف جسٹس اسلام آباد ہائیکورٹ جسٹس عامر فاروق نے کی سماعت کے دوران عمران خان کی جانب سے فیصل فرید چوہدری ایڈووکیٹ اور وفاق کی جانب سے سٹیٹ کونسل عدالت پیش ہوئے،دوران سماعت عمران خان کے خلاف اسلام آبادمیں درج انتیس مقدمات کی تفصیلات سے متعلق رپورٹ عدالت پیش کی گئی،پولیس نے اٹھائیس جبکہ ایف آئی اے نے ایک مقدمے کا ریکارڈ جمع کروایا، رپورٹ میں کہاگیاکہ پولیس کے مقدمات میں سے ایک مقدمہ خارج ہوچکا،سات کیسز تفتیشی مراحل میں ہیں، بیس مقدمات ٹرائل کورٹ میں زیر سماعت ہیں،ایف آئی اے فارن ایکسچینج ایکٹ کے تحت درج مقدمہ بینکنگ کورٹ میں زیر سماعت ہے، سٹیٹ کونسل نے کہاکہ اسلام آباد پولیس نے عمران خان کے خلاف اٹھائیس مقدمات درج کر رکھے ہیں، ایف آئی اے میں عمران خان کے خلاف ایک مقدمہ درج ہے، عمران خان کے وکیل فیصل فریدچوہدری ایڈووکیٹ نے کہاکہ کوئی ایک مقدمہ ہو تو سمجھ آتی ہے یہاں بہت سے ہیں،آئی جی کے نمائندہ بھی یہاں عدالت میں ہیں،ہمیں شامل تفتیش ہونے کا کہا گیا ہے لیکن کوئی فون نہیں اٹھاتا، اس موقع پر چیف جسٹس نے وفاقی پولیس حکام کو ہدایت کی کہ بیٹھ کر تمام صورتحال کو دیکھیں اور فیصل چوہدری کے ساتھ رابطے میں رہیں، پولیس رپورٹ جمع ہوجانے کے بعد عدالت نے درخواست ہدایت کے ساتھ نمٹا دی۔ |