اٹھارہ لوگوں کے اکاؤنٹس میں چار ہزار ارب روپے ہیں،سراج الحق

اسلام آباد میں نیوز کانفرنس سے خطاب کے دوران سراج الحق نے مطالبہ کیا کہ ججز، جرنیل، بیورو کریٹس اور سیاستدان قربانی دیں، سراج الحق کا کہنا تھا کہ پی ڈی ایم کی حکومت میں مہنگائی میں چونتیس فیصد اضافہ ہوگیا ہے، ایک سو ساٹھ روپے فی کلو آٹا ہو تو ایک سربراہ کیسے دس بارہ بندوں کی کفالت کرسکتا ہے۔ ابھی مزید چھ سو پچاس ارب کا قوم سے نکالے جائیں گے۔ سراج الحق کا کہنا تھا کہ پی ڈی ایم مہنگائی کے خلاف پی ٹی آئی حکومت مخالف ریلیاں نکالتی تھی لیکن پی ٹی آئی کی طرح پی ڈی ایم کی حکومت بھی سو فیصد ناکام ہوگئی۔ امیر جماعت اسلامی کا کہنا تھا کہ سابق وزیراعظم کہتا تھا سکون قبر میں ہے اور یہ وزیراعظم کہتا ہے اپنے کپڑے بیچوں گا، صرف چہرے بدلے ہیں لیکن اشرافیہ ایک ہی ہے انہوں نے سپریم کورٹ کے ججز سے مطالبہ کیا کہ پاکستان میں نجی جیلوں پر ازخود نوٹس لیں، آج بھی سندھ کے علاقے خیر پور اور کچے کے علاقے میں چھیالیس لوگ یرغمالی ہیں، سندھ حکومت ان لوگوں کو بازیاب کروائے۔