لیول پلیئنگ تو دور ہمیں تو فیلڈ بھی نہیں دی گئی،بیرسٹر گوہر

پاکستان تحریک انصاف کے رہنما گوہر خان کہتے ہیں ہمیں برابری کی سطح پر الیکشن لڑنے کا موقع تو کیا دینا ہمیں فیلڈ ہی نہیں دی گئی، بلا بھی چھین لیا گیا۔ بولے شاندار پاکستان، شاندار مستقبل اور خراب ماضی سے چھٹکارا، یہ ہمارا نعرہ ہے اسلام آباد میں نیوز کانفرنس سے خطاب کے دوران بیرسٹر گوہر کا کہنا تھا کہ نہ ہمیں کاغذات فراہم کیے گئے نہ ہی مخالفین سے سوالات کرنے کا موقع ملا،بانی پی ٹی آئی کے خلاف سائفر اور نیب کے کیسز سمیت الیکشن کمیشن کی توہین کا کیس بھی جیل میں ہی چل رہا ہے۔ بیرسٹر گوہر کا کہنا تھا کہ صبح 8 سے شام 4 تک انتہائی جلد بازی میں کیس چلایا جارہا ہے، ملزم کی مرضی کے خلاف جج صاحب نے سرکاری وکلا کو متعین کردیا، سزائے موت کی طرف بڑھنے والے اس کیس میں عدل اور آئین کو نظر انداز کیا جارہا ہے۔ بیرسٹر گوہر کا کہنا تھا کہ چیف الیکشن کمشنر نے ہمیں یقین دہانی کروائی تھی کہ مساوی سلوک ہوگا، ہم الیکشن کمیشن سے مطالبہ کرتے ہیں کہ ہمارے راستے میں رکاوٹیں نہ ڈالی جائیں۔ ہمارا مطالبہ ہے ہمیں بطور شہری اور سیاسی جماعت برابری کی سطح پر الیکشن لڑنے کے مواقع دیں، ہمیں پرامن طور پر برابری کی سطح پر الیکشن کا حصہ تو دور ہم سے فیلڈ ہی چھین لی گئی۔ تحریک انصاف کے رہنماء کا کہنا تھا کہ ہمارے امیدوار آزاد نشان سے لڑ رہے ہیں لیکن وہ اپنی پارٹی کیساتھ ہیں، شاندار پاکستان، شاندار مستقبل اور خراب ماضی سے چھٹکارا، یہ ہمارا نعرہ ہے