انسداد دہشت گردی عدالت سے منظور پشتین کی دو کیسز میں ضمانت منظور

اسلام آباد کی انسدادِ دہشت گردی عدالت نے پشتون تحفظ موومنٹ کے مرکزی رہنما منظور پشتین کی دو کیسز میں ضمانت منظورکر لی۔ تفصیلات کے مطابق اسلام آباد کی انسدادِ دہشت گردی کی عدالت نے منظور پشتین کی 30، 30 ہزار روپے کے مچلکوں کے عوض دو کیسز میں ضمانتیں منظور کی ہیں۔ پشتون تحفظ مومنٹ (پی ٹی ایم) کے سربراہ منظور پشتین کو رواں ماہ چمن سےگرفتار کیا گیا تھا۔ واضح رہے کہ منظور پشتین کی گرفتاری کے حوالے سےچمن کے ڈپٹی کمشنر کا کہنا تھا کہ پولیس، لیویز اور ایف سی باب چمن کے قریب معمول کی چیکنگ کر رہے تھے کہ منظور پشتین کے ساتھ مسلح افراد نے گاڑی روکنے کے بجائے اہلکاروں پر چڑھائی اور فائرنگ کی۔ ڈپٹی کمشنر کا کہنا تھا کہ اہلکاروں نے جوابی کارروائی میں منظور پشتین کی گاڑی کے ٹائر پر فائرنگ کی تھی جس پر منظور پشتین اور ان کے ہمراہ مسلح افراد گاڑیاں بھگا کر فرار ہو گئے تھے،تاہم بعدازاں سرچ آپریشن کے بعد ایک گودام سے منظور پشتین کو گرفتار کیا گیا تھا۔