عمران خان کے ناقابل ضمانت وارنٹ گرفتاری،پاکستان کا اندرونی معاملہ ہے،امریکہ

ہفتہ وار پریس بریفنگ کے دوران ایک پاکستانی صحافی کے سوال کا جواب دیتے ہوئے امریکی وزارت خارجہ کے ترجمان نیڈ پرائس کا کہنا تھا کہ پاکستان میں جمہوریت، آئین اور قانون کی حمایت کرتے ہیں لیکن آپ کا سوال سراسر پاکستان کا اندرونی معاملہ ہے۔ اس لیے یہ سوال پاکستان کی عوام سے کیا جانا چاہیے۔ مقبوضہ کشمیر کی موجودہ صورتحال کے حوالے سے امریکی وزارت خارجہ کے ترجمان کا کہنا تھا کہ آزادیٔ اظہارِ رائے بنیادی انسانی حقوق ہے جس کی اہمیت کو دنیا میں اجاگر کرتے رہتے ہیں انٹرنیٹ تک رسائی کشمیر سمیت دنیا کی دیگر جمہوریتوں کو مضبوط بنانے کے لیے اہم ہے۔ پاکستان میں افغان مہاجرین کے خلاف کریک ڈاؤن آپریشن سے متعلق پوچھے گئے سوال کے جواب میں نیڈ پرائس نےکہا کہ اس معاملے پر حکومتِ پاکستان کے ساتھ رابطے میں ہیں۔ امریکی وزارت خارجہ کے ترجمان کا کہنا تھا کہ ہم تمام ریاستوں کی افغان پناہ گزینوں کے حوالے سے اپنی اپنی ذمہ داریوں کو پورا کرنے کی حوصلہ افزائی کرتے ہیں اور مہاجرین کو واپس ایسی جگہ بھیجنے کی مخالفت کرتے ہیں جہاں انھیں ظلم و ستم کا سامنا ہو۔