کنن پورہ اجتماعی زیادتی کیس کے بتیس سال،مجرم بھارتی حکومت کی سرپرستی میں آزاد

تفصیلات کے مطابق تئیس فروری انیس سو اکیانوے کو بھارت کی بزدل فوج کی طرف سے خواتین کے ساتھ اجتماعی زیادتیاں آزادی پسندوں کی طرف سے بھارتی فوج پر فائرنگ کے جواب میں انتقامانہ کارروائیوں کے طور پر کی گئیں سترہ مارچ انیس سو اکیانوے کو چیف جسٹس جموں و کشمیر کے تحقیقاتی کمیشن کے سامنے ترپن کشمیری خواتین نے بھارتی فوجیوں کی طرف سے عصمت دری کا اعتراف کیا پندرہ سے اکیس مارچ انیس سو اکیانوے کے دوران ہونے والے طبی معائنوں میں بتیس کشمیری خواتین پر تشدد اور جنسی زیادتی ثابت ہو ئی۔ انیس سو بانوے میں امریکی سٹیٹ ڈپارٹمنٹ کی شائع کردہ رپورٹ میں بھی کہا گیا کہ ” کنن پوش پورہ سانحے میں بھارتی فوج کے خلاف اجتماعی زیادتی کے ناقابلِ تردید ثبوت موجود ہیں “۔ مقامی لوگوں نے اپنی مدد آپ کے تحت انصاف کے حصول کے لئے کنن پوش پورہ تحقیقاتی کمیشن تشکیل دیا جسے بھارتی حکومت نے جَبری ختم کر دیا۔بھارتی حکومت نے سانحہ کو پروپیگنڈہ قرار دے کر بھارتی فوج کو بری الزمہ قرار دے دیاتھا۔ جبکہ بھارتی فوج نے سانحے کو چھپانے کی خاطر پولیس حکام کے متعدد بار تبادلے بھی کئے۔ واضح رہے اب تک عالمی حقوق کی بین الاقوامی تنظیمیں بھارتی حکومت سے سانحہ کی تحقیقات کا کئی بار مطالبہ کر چکی ہیں۔آج تک انسانی تاریخ کے بدترین سانحے کے متاثرین کو انصاف نہ ملنا نام نہاد بھارتی انصاف کے منہ پر طمانچہ ہے۔ بتیس سال گُزرنے کے باوجودکنن پوش پورہ کے مجرمان بھارتی ریاستی سرپرستی میں آزاد ہیں۔ بھارتی حکومت نے فوج کوکشمیر میں عصمت دری کو بطورہتھیار استعمال کر کے تحریکِ آزادی کوکُچلنے کی کھلی اجازت دے رکھی ہے۔جولائی انیس سو نوے میں کشمیر میں کالا قانون AFSPA عائد کیاگیاجسے بھارتی فوج کشمیریوں پر مظالم کے لئے استعمال کرتی ہے۔ ایمنسٹی انٹرنیشنل نے اپنی رپورٹ میں کہاکہ AFSPA کا کالا قانون مقبوضہ جموں کشمیر میں انسانی حقوق کی سنگین خلاف ورزیوں کا باعث بن رہاہے،AFSPA کے قانون کے باعث مقبوضہ جموں و کشمیر میں تعینات بھارتی فوج کو انسانی حقوق کی دھجیاں بکھیرنے کا پورا موقع فراہم کیاگیاہے۔ اس قانون کے باعث بھارتی فوج کو یہ اختیار حاصل ہے کہ وہ خواتین کی عصمت دری کریں یا نہتے کشمیریوں کو گولیوں سے بھون دیں۔ انسانی حقوق کی تنظیموں کا کہناہے کہ بھارتی فوجیوں کے خلاف کبھی کوئی شفاف انکوائری نہیں کی گئی بلکہ انہیں انسانیت کے کھلواڑ کیلئے کھلی چھوٹ دی گئی ہے۔ تنظیموں کا کہناہے کہ خواتین کی عصمت دری میں ملوث کبھی کسی فوجی اہلکار کے خلاف کوئی انکوائری نہیں ہوئی نہ ہی کسی کو ابھی تک سزا ہوئی۔کنن پوشپورہ اجتماعی عصمت دری، شوپیاں میں عصمت دری اور دہرے قتل اور کٹھوعہ میں کمسن بچی سے زیادتی اور قتل جیسے واقعات بھارتی فورسز کے ظالمانہ چہرے کی عکاسی کرتے ہیں۔انیس سو نواسی سے اب تک گیارہ ہزار سے زائد عصمت دری اور اجتماعی زیادتیوں کے واقعات رونما ہوچکے ہیں۔کیا عالمی حقوق کی تنظیمیں اجتماعی زیادتی کے بد ترین سانحہ کو بغیر تحقیقات کے نظر انداز کر دیں گی؟پاکستان میں خواتین کے حقوق کا پرچار کرنے والی نام نہاد تنظیمیں کنن پوش پورہ سانحے پر خاموش کیوں ہیں؟