وزارتوں اور ڈویژنز کو ای میلز کے استعمال میں احتیاط برتنے کی ہدایت

وفاقی حکومت نے وزارتوں اور ڈویژنز کو ای میلز کے حوالے سے احتیاط برتنے کی ہدایت کردی۔ ذرائع کے مطابق کابینہ ڈویژن نے تمام وفاقی وزارتوں اور ڈویژنز کو مراسلہ بھجوا دیا ہے جس میں بتایا گیا ہے کہ ’جے ایس کوآرڈ‘ کی طرف سے فیک ای میلز زیرِ گردش ہیں، فیک ای میلز کے ساتھ خطرناک پے لوڈ اٹیچ ہیں۔ جعلی ای میلز کے ذریعے وزارتوں اور ڈویژنز سے معلومات حاصل کرنے کی کوشش بھی کی جا رہی ہے ذرائع کا کہنا ہے کہ یہ فیک ای میلز وزارتوں کے نیٹ ورک اور سسٹم کی سیکیورٹی کو نقصان پہنچا سکتی ہیں۔ وزارتوں اور ڈویژنز کو تمام موصول شدہ ای میلز پر محتاط رویہ اپنانے کی ہدایت کی گئی ہے اور مراسلے میں موصول ای میل کا ایڈریس اور ڈومین کی پیشگی تصدیق کرنے کی تجویز دی گئی ہے۔