ملک کے مختلف حصوں میں سردی کا راج،کہیں بارش،کہیں برفباری

تفصیلات کے مطابق مغربی ہواؤں کا نیا سسٹم ایران سے شمالی بلوچستان میں داخل ہوگیا۔ محکمہ موسمیات نے دو روز تک بلوچستان کے تیرہ اضلاع میں بارش اوربرف باری کی پیشگوئی کی ہے،جبکہ شمالی بلوچستان میں درجہ حرارت منفی چودہ سینٹی گریڈ تک گرنے کا امکان ہے۔جمعرات سے کراچی میں بھی سردی کی لہر کی پیشگوئی کردی گئی ہے۔ محکمہ موسمیات کے مطابق پاراچنار کے بالائی علاقوں میں برفباری کا سلسلہ جاری ہے۔ پہاڑوں علاقوں میں چار سے لیکر آٹھ انچ برف پڑنے کی اطلاعات ہیں۔ اسلام آباد، لاہور، فیصل آباد سمیت مختلف علاقوں میں وقفے وقفے سے بارش کا سلسلہ جاری ہے۔ گوجرانوالہ، سرگودھا، ملتان سمیت پنجاب کے کئی شہروں میں بارش کا امکان ہے۔