کمان تبدیلی کے لئے استعمال ہونے والی ملاکا اسٹک کیا ہے؟؟؟؟

بری فوج میں کمان کی تبدیلی،کمان کی تبدیلی کے وقت دی جانے والی چھڑی کی حقیقت کیا ہے انتیس نومبر کو پاکستان کی بری فوج کی کمان کی تبدیلی کی تقریب ہو رہی ہے جس میں موجودہ آرمی چیف جنرل قمر جاوید باجوہ کمان اسٹک نئے آرمی چیف جنرل عاصم منیر کے حوالے سے کریں گے، کمان کی تبدیلی کے دوران دی جانے والی سٹک کوملاکا اسٹک یا کمانڈ اسٹک بھی کہا جاتا ہے، آرمی کمان کی یہ چھڑی انگریزوں کے دور سے فوجی روایت کا حصہ چلی آ رہی ہے۔اصل اہمیت آرمی کمان کی اسٹک کی نہیں بلکہ عہدے اور اس سے منسلک ذمہ داریوں کی ہے جو پرانا افسر نئے آنے والے افسر کو یہ چھڑی سونپ کر خود نئی تفویض کردہ ذمہ داریوں پر جاتا ہے۔ کمان تبدیلی کےلئے استعمال ہونے والی ملاکا سٹک کی تیاری کےلئے بھی خاص لکڑی استعمال کی جاتی ہے،ملاکا اسٹک کو سنگاپور کے ایک جزیرے ملاکا کی ایک خاص کین سے تیار کیا جاتا ہے۔ ملاکا رتن کی ایک قسم ہے جو انڈونیشیا میں سماٹرا کے ساحل پر بھی پائی جاتی ہے۔ رتن کے درخت میں لمبے، پتلے تنے ہوتے ہیں جو واکنگ اسٹکس بنانے کے لیے بہترین سمجھے جاتے ہیں۔ اگر اس چھڑی کی بناوٹ پر غور کریں تو اس میں2، 2 انچ کے فاصلے پر گانٹھ ہوتی ہےجو دیکھنے میں بانس کی لکڑی کی طرح ہی دکھائی دیتی ہے لیکن اس کے مقابلے پتلی ہوتی ہے۔ یہ وزن میں بہت ہلکا لیکن مضبوط ہوتا ہے اور اس میں کوئی دو نمونے ایک جیسے نہیں ہیں۔دنیا بھر کی افواج کے سربراہان اسے کمان اسٹک کے طور پر زیر بازو اور کبھی ہاتھ میں اپنی میعاد کے دوران رکھتے ہیں۔یہ کوئی معمولی اسٹک نہیں ہوتی، چھڑی کو فوج میں کمانڈ کی علامت سمجھا جاتا ہے، نئے آرمی چیف کو ملاکا چھڑی دینے کی روایت برطانوی دور سے چلی آ رہی ہے۔ملاکا کی چھڑی سری لنکا، ہندوستان، برطانیہ سمیت کئی ممالک میں فوجی وردیوں کا حصہ ہے۔ چھڑی علامتی طور پر آرمی چیف کی شخصیت اور طاقت میں اضافہ کرتی ہے لیکن اصل اہمیت آرمی چیف کے کندھوں پر ذمہ داریوں اور اختیارات کی ہے۔