ہزارہ ایکسپریس ٹریک سے اترگئی،متعدد مسافر زخمی،ہسپتالوں میں ایمرجنسی نافذ

کراچی سے حویلیاں جانے والی ہزارہ ایکسپریس نواب شاہ کے قریب پٹری سے اتر گئی، 50 سے زائد افراد کے زخمی ہونے کی اطلاعات ریلوے حکام کے مطابق کراچی سے آنے والی ہزارہ ایکسپریس سرہاری ریلوے اسٹیشن کے قریب حادثے کا شکار ہوگئی، حادثے میں ہزارہ ایکسپریس کی کئی بوگیاں ریلوے ٹریک سے اتر گئیں۔ ریلوے حکام کے مطابق لوکوشیڈ روہڑی سے ریلیف ٹرین جائے حادثہ روانہ کر دی گئی ہے حادثے کے باعث اپ ٹریک پر ٹریفک معطل ہے۔ حکام کے مطابق فی الوقت حادثے کی وجوہات کے بارے میں معلوم نہیں ہو سکا ہے جبکہ مقامی پولیس کے مطابق ہزارہ ایکسپریس میں سوار مسافروں کو بوگیوں سے نکالنے کا کام جاری ہے۔ ٹرین میں موجود مسافروں کے مطابق ہزارہ ایکسپریس میں بہت زیادہ مسافر سوار تھے دوسری جانب ٹرین حادثے کے باعث قریبی اسپتالوں میں ایمرجنسی نافذ کر دی گئی ہے جبکہ ٹرین حادثے میں زخمی ہونے والے افراد کو پیپلز میڈیکل اسپتال منتقل کیا جا رہا ہے۔