ٹانک میں مردم شماری ٹیم پر فائرنگ،سیکیورٹی فورسز کی جوابی کارروائی دہشتگرد کمانڈر مارا گیا

آئی ایس پی آر کے مطابق دہشت گردوں نے ضلع ٹانک کے علاقے رغزئی میں مردم شماری کی سیکیورٹی ڈیوٹی پر مامور پولیس پارٹی پر فائرنگ کی جس کے نتیجے میں ایک پولیس اہلکار شہید ہو گیا، واقعہ کی اطلاع ملنے پر سیکورٹی فورسز نے فوری طور پر علاقے کو گھیرے میں لے کر فرار کے تمام ممکنہ راستے بند کر دیئے، فرار ہونے والے دہشت گردوں کو ضلع ڈیرہ اسماعیل خان کی تحصیل کلاچی کے علاقے گڑہ گلداد میں روکا گیا، شدید فائرنگ کے تبادلے کے بعد دہشت گرد کمانڈر عبدالرشید عرف رشیدی مارا گیا، مارا گیا دہشت گرد سیکیورٹی فورسز کے خلاف متعدد دہشت گردی کی کارروائیوں سمیت معصوم شہریوں کے قتل میں پولیس کو مطلوب تھا، ہلاک دہشت گرد سے اسلحہ اور گولہ بارود بھی برآمد کرلیا گیا، علاقے کے لوگوں نے دہشت گردی کی لعنت کے خاتمے کے لئے آپریشن اور سیکیورٹی فورسز کے عزم کو سراہا،،