درجہ حرارت اور فضائی آلودگی،کتے کے کاٹنے کے واقعات میں اضافے کا باعث(تحقیق)

امریکا کے ہارورڈ میڈیکل اسکول میں کی جانے والی نئی تحقیق کے مطابق درجہ حرارت اور ماحول میں آلودگی میں اضافے کی وجہ سے کتوں کے کاٹنےکے واقعات میں اضافہ ہوسکتا ہے جرنل سائنٹفک رپورٹس میں شائع ہونے والی تحقیق میں محققین کا کہنا تھا کہ مطالعے میں یہ نتیجہ اخذ کیا گیا ہے کہ گرم اور آلودہ دنوں میں انسانوں اور کتوں کے درمیان جارحانہ ٹاکرا ہوسکتا ہے، جس سے یہ بات سامنے آتی ہے کہ انتہائی گرمی اور فضائی آلودگی بھی جانوروں کی جارحیت کا سبب بن سکتی ہیں۔ ہارورڈ میڈیکل اسکول کے کلاس لِنمن اور ان کے ساتھیوں نے آٹھ امریکی شہروں(ڈیلاس، ہیوسٹن، بالٹی مور، بیٹن، روج، شیکاگو، لوئیزوِل، لاس اینجلس اور نیویارک سٹی) میں 2009 سے 2018 کے درمیان پیش آنے والے کتوں کے کاٹنے کے واقعات کے اعداد و شمار کا جائزہ لیا،جس سے معلوم ہوا کہ جن دنوں میں الٹرا وائلٹ شعاعوں کی مقدار زیادہ تھی تب کتوں کے کاٹنے کے واقعات میں اضافہ دیکھا گیا۔ جبکہ جن دنوں میں زیادہ بارشیں ہوئیں تب ان واقعات میں کچھ کمی دیکھنے میں آئی۔